Er du Fjordane Folkehøgskule sin neste vikinghøvding eller vikingkvinne? Vi søkjer ein vikinglivlærar i 50%- vikariat.

Fjordane Folkehøgskule søkje etter ein engasjert lærar med undervisningserfaring og kunnskap om vikingtida. Du er ein vikingentusiast og kan di vikinghistorie.  

Vikinglivlinja på Fjordane Folkehøgskule er djupt forankra i vår lokale kulturarv. På Nordfjordeid har vi Myklebustskipet, lokale vikinglag og vi held til på staden som skal bli kraftsenteret frå vikingtida. På vikinglivlinja får elevane oppleve eit breitt spekter av fag og praksis – alt frå kulturhistorie, handverk og saum, til matlaging, kampleik, gardsarbeid, musikk og reise.

Som lærar får du sjølv påverke mykje av innhaldet på linja, i godt samarbeid med elevane. Stillinga er eit vikariat i 50%-stilling frå 01.08.2024 til og med 31.12.2024, med moglegheit for forlenging. Kortare undervisningsperiodar kan også vere av interesse for riktig kandidat. Vi oppfordrar kvinner til å søkje på stillinga. 

Kven ser vi etter?

• Du har utdanning i historie og/eller handverk frå fagskule eller høgskule/universitet. Dersom du har ei anna utdanning vil du likevel bli vurdert så lenge lidenskapen din til vikingtida er der. Vi legg stor vekt på personlege eigenskapar.  

• Du har gjerne erfaring frå vikingmiljøet i Norge og har undervisningskompetanse 

i gamle handverkstradisjonar, historie og samfunnsfag.   

• Du likar å formidle forteljingar og historie på ein engasjerande og kreativ måte. Du er trygg, ansvarsbevisst og likar å jobbe med unge menneske. Du meistra planlegging og organisering, samtidig som du er fleksibel og alltid klar for å finne løysingar. 

Dine arbeidsoppgåver vil vere: 

• Ansvar for elevane og det heilheitlege tilbodet på vikinglivlinja, der du skal leie elevane gjennom ei reise tilbake til vikingtida.  

• Undervisning i eit bredt utval av relevante tema relatert til vikingtida, som til dømes matauk, pil og boge, skinnarbeid og steingods.  

• Samarbeid med andre linjer på skulen for å skape tverrfaglege prosjekt. 

• Ansvar for planlegging og organisering av vikinglivlinja for å legge til rette for at elevane skal skape sitt beste år saman med oss. 

• Tilsyn og sosialpedagogisk arbeid. Du skal vere ein støttande person for elevane og hjelpe dei å vekse både fagleg og personleg.  

• Undervisning i valfag, som til dømes salmakar, blankvåpen, urbant landbruk, friluftsliv, og livsfilosofi. 

Kvifor skal du velje oss?  

Fjordane Folkehøgskule er staden der du får oppleve vikinghistoria tett på kroppen. Her har vi opparbeida vårt eige vikingtun, med eit storslått langhus som sjølve hjartet i tunet. Vi samarbeider også med Sagastad – vestlandet sitt nye vikingsenter. Du vil blant anna få vere med å ro det 30 meter lange Myklebustskipet etter sjøsetting, og gje elevane gleda av å skape noko med eigne hender i smiene våre der du skal lære dei tradisjonelle handverksteknikkar.  

Som folkehøgskule er vi opptatt av å vere ein stad der elevane våre skal kjenne at dei høyre til. Med oss skal dei få rom til å puste, vere seg sjølv, lære nye ting og få vener for livet. Dette gjeld også for deg og dine kollegaer. Vi er opptatt av å skape eit triveleg arbeidsmiljø for oss som jobbar her. I tillegg til å reise på skuleturar saman med elevane våre, arrangera vi blåturar i nærområdet, sommarfestar og felles trening for tilsette som likar det. Annifrid og Øystein utfordrar deg gjerne til ein ping-pong konkurranse i lunsjen, og likar du betre biljard vil du få bryne deg på Khang. Vi er heldige og har flinke kokkar som byr på nydeleg lunsj laga av lokale og sesongbaserte råvarer. Du vil også få gode pensjonsvilkår med KLP-ordninga vår. 

Gjennom ein meiningsfull kvardag ynskjer vi å utfordre elevar og tilsette til å vere ansvarlege deltakarar i eit berekraftig fellesskap. Saman skal vi skape vårt beste år gjennom utvikling, glede og vennskap. 

Kvar held vi til?  

Mellom den største fastlandsbreen i Europa og det villaste havet i Noreg ved Stad ligg Nordfjord. I midten av denne vakre fjorden finn du folkehøgskulen vår – i smørauget av Nordfjordeid sentrum.  Her kan du oppleve alt frå spektakulære fjellturar, til surfeparadiset i Hoddevika og eit rikt kulturliv – og alt i mellom. Er du glad i musikk kan vi freiste med både musikkfestivalen Malakoff og Operahuset Nordfjord. For deg som er historieinteressert kan vi også nemne at vi har Noregs einaste kvinnelege helgen, Sankt Sunniva.  

På Fjordane Folkehøgskule har vi ei unik samansetning av linjer: Friluftsliv er ei reise gjennom årstidene, Movement X er den einaste nysirkuslinja i landet, Vikingliv har eige langhus og Musikal er lokale og internasjonale. Vi er størst på hest med to allsidige hestelinjer, Kunst/foto/glas/reise freistar mange, kreativ saum og strikk står for det grøne klesskifte og Bu og fritid er tilpassa dei elevane som treng ekstra tilrettelegging 

Skal du søkje?  

Har du ein viking i deg så er dette staden for å utforske livet slik våre forfedre levde det. Kanskje det no er på tide å hoppe i det og arbeide med det du verkeleg har lyst til?  Send søknad  og CV på e-post til rektor@fjordane.fhs.no innan 21. juli 2024. Har du spørsmål kontakt Rektor Silvia van Hesik Førde på telefon 926 12 455.