Friluftsliv All-inclusive!
Opplev Vestlandet: Surfeparadiset Hoddevika, fjellklatring i Sunnmørsalpene og ski over Jostedalsbreen. Togtur gjennom dei Østerrikske Alpane. Rå natur, spenning, meistring og samhald - All inclusive!
Linja passar for deg som er glad i å vere ute i naturen heile året. Du likar å vere i bevegelse og tar gjerne ei utfordring.
Eit år for deg som er glad i naturen:
Frå bølgesurfing ytterst ute i havgapet til brevandring innerst i fjorden - og alt i mellom. Fjordane folkehøgskule ligg midt i regionen Nordfjord som er kjend for nokre av dei vakraste strendene, dei flottaste bølgene og dei kjekkaste fjelltoppane i landet. Den varierte naturen og tydelege årstidene gir oss uante moglegheiter til å utforske elementa og oss sjølve i samspel med naturen. Saman skal vi utforske spektakulære fjell, mystiske skogar, leikne surfebølger og djupe fjordar!
Surfing
Vi nyttar nærområdet vårt og dreg på bølgesurfing i eigen kommune til surfeparadisa i Hoddevik og Ervik på Stadlandet. Dette gjer vi gjennom heile året.
Klatring
Vi klatrar ute om hausten og våren og kjenner på rørslefridom gjennom klatring på naturstein. Vinteren brukar vi innandørs i tau- og buldrevegg for å bygge teknikk, tauferdigheit og fysikk. Målet er at alle skal få brattkort i løpet av året.
Hamna er vår lokale buldregym, med moderne fasilitetar og nokre av Noregs beste rutesettarar som set nye bulder kvar veke. Skulen har avtale med Hamna for elevar som vil bruke senteret utanom undervisninga.
I området rundt skulen ligg mange flotte utandørs buldre- og klatrefelt, og berre 45 minutt unna ligg norges mest besøkte klatrefelt Beachen.
Padling
I løpet av hausten padlar vi kajakk på Hornindalsvatnet, Nord-Europas djupaste innsjø, vi er ute i bølgene på Stadlandet og sjølvsagt i den flotte Nordfjorden vår. Målet er at alle skal bestå Grunnkurs Kajakk, som tilsvarar våttkort.
Elv
Eidselva er ei flott _meanderdals_ elv, som svingar seg breitt i landskapet. Delar av denne elva kan vi padle, eller flyte nedover for å kike på stor-laksen.
Topptur
Tenk deg kjensla av å være så liten, men samstundes så stor, på toppen av tindar! Vi går til fots, på truger, ski eller brett på mange av dei flotte toppane vi har rundt skulen. På Vestlandet er det gode sjansar til å sette nokre ferske, djupe svingar i puddersnø!
Bre
Om hausten skal vi på ein tre-dagars tur til Supphellebreen, der vi skal gå i taulag og klatre på isformasjonar.
Segling
Du får introduksjon til grunnleggande segle-ferdigheiter på Nordfjorden vår. I tillegg skal vi på ein felles strandrydde-seglas med resten av skulen. Då skal vi segle og bu om bord på «Loyal», verdas eldste Galeas!
Sanking
Rett ved skulen fins eit stort matfat i skogen med sopp, bær, plantar og røter. I grønsakshagen vår dyrkar vi grønsaker vi skal lage deilige matrettar av. På skulen har vi eit flott elevkjøken inne, og ute kan vi lage mat i vikingtunet.
Vinterskog
Sjå for deg ein trugetur der du skal sove under stjernene, medan du kjenner varmen og lukta frå det store bålet. Vinterskogen byr ofte på rolege kulissar, der vi kan bli kjend med oss sjølve og rutinane våre i det kalde elementet. Før vinteren skal vi saman med elevane på vikingliv lage våre eigne truger som vi brukar i skogen når snøen kjem.
Vinterfjell
Vinterfjellet kan vere både vakkert og brutalt. Tryggleik og skredlære er sentralt i undervisninga, og vi kjem til å dra på mange turar i lag med den andre friluftsliv-linja på skulen, Friluftsliv i samarbeid med Røde Kors. I løpet av vinteren blir det også ein tre-dagars snøholetur der vi skal ovenatte inne i snøen.
Kystkultur
I tusenvis av år har vi nytta kysten til arbeid, rekreasjon og matauk. Dei ulike sesongane gir oss spennande opplevingar med seglbåt, fiske, sanking og tilbereding av mat. Saman med Vikingliv og Friluftsliv i samarbeid med Røde Kors skal vi på tur ut på vestkysten for å lære meir om akkurat dette. Kanskje blir det også undervannsjakt mellom tang og tare?
Kart og kompass
Å kunne orientere seg i terrenget er avgjerande for å ferdast trygt i skogen og på fjellet. Kart og kompass kjem vi difor til å bruke aktivt når vi er på tur. I løpet av hausten får de, saman med Friluftsliv i samarbeid med Røde Kors, utfordra dykk sjølve på overnattingsturen “På villspor”. På denne turen skal vi finne tilbake til skulen fra ein ukjend stad i fjellet!
Førstehjelp
Saman med Friluftsliv i samarbeid med Røde Kors skal vi lære førstehjelpsteori og trene på søk og redning i naturen.
Ski og brett på Harpefossen
Harpefossen er vårt lokale skisenter, med mange preparerte løyper og utruleg flott frikjøyring i bjørkeskog. Like ved skianlegget har vi moglegheit til å låne ei hytte.
Linjetur: Frå Fjordane til Alpane!
Klatring, rafting, stisykling, togtur gjennom Europa, vandring i Tyrol og besøk i Innsbruck. Bli med på linjeturen du aldri kjem til å gløyme! Fjordane - Østerrike - Fjordane på 14 dagar!
Saman med Friluftsliv i samarbeid med Røde Kors reiser vi langsamt og miljøvennleg med tog nedover i Europa. Vandreruta gjennom Europas største fjellmassiv er ein 5-6 dagars “high altitude trail” i Tyrol – i hjartet av Alpane. Kvar kveld søv vi på fjellhytter, “Almar”, der vi får servert mat og ei seng å sove i.
Etter dager med vandring på over 2000 meter høgde, utforskar vi den alpine byen Innsbruck, og vidare Oetztal. Der blir basecamp medan vi klatrar, raftar og sti-syklar. Etter to veker med unike natur- og kulturoppleingar i bagasjen, flyr vi heim til Noreg.
Saman skal vi skape minne for livet!
Turar for friluftslinjene
Friluftsliv All-inclusive og Friluftsliv i samarbeid med Røde Kors skal saman utforske fjord, fjell og hav på Nordvestlandet. Vi drar på mange dagsturar, men også nokre lengre turar i nærområdet med overnatting ute.
Nærturar
Overnattingstur “På villspor”
Å kunne orientere seg i terrenget er avgjerande for å ferdast trygt i skogen og på fjellet. Kart og kompass kjem vi difor til å bruke aktivt når vi er på tur. På denne turen får vi utfordra oss sjølve når skal vi finne tilbake til skulen fra ein ukjend stad i fjellet!
Overnatting i “Finsesatelitt”
Vinterfjellet kan vere både vakkert og brutalt. Tryggleik og skredlære er sentralt i undervisninga. Vi drar på tre-dagars tur med der vi lagar vår eigen Finsesatelitt - ein undersnøisk hotell med intrikate gangar mellom romma.
Tur til kysten
Vi drar ut til vestkysten for å lære meir om seglbåt, fiske, sanking og tilbereding av mat. Kanskje blir det også undervannsjakt mellom tang og tare?
Overnatting på fjelltopp
Har du lyst til å sovne til solnedgangen, vakne opp til soloppgangen; med stjernehimmelen midt i mellom?
Telemark
Vi skal lære den edle og tradisjonsrike kunsten å køyre med laus hæl, og kjenne på røyrslefridomen nedover den mjuke laussnøen og preppa løyper med fjellski.
Måneskinnstur
Når månelyset skin med sitt dempa og sarte lys, og kastar skuggar på eit kvitt snødekke, skal vi liste oss ut under ein fullmåne og bli kjend med natta sin skjulte dynamikk.
Kråkenes fyr
Du har kanskje høyrt uttrykket “Storm ved Stad”, men har du opplevd det? Når det bles opp til skikkelig ruskevêr, snik vi oss til ei natt ved Kråkenes fyr, heiltut mot havet. Her skal vi kjenne på dei store naturkreftene, og la havet og vinden ta pusten frå oss.
Linjetur: Josten på langs
Sjølvaste klassikaren blant vår-skiturar! Dette er skitur, topptur, bretur, telttur og langtur i eitt. Turen startar innerst i Jostedalen, og går over heile Jostedalsbreen, Europas største isbre.
Gjennom året skal vi saman lære oss korleis vi blir i stand til å vere ute over lengre periodar, trekke pulk, bli stødige på ski og bu tett saman i telt på vinteren. Gle deg til 5 dagar i eventyrlege Jotunheimen med ski og pulk! Du får oppleve storslått natur og testa grensene dine i trygge rammer saman med læraren din og medelevane dine.
Den ultimate turen for å avslutte ditt beste år..!
Linjelærar Kjartan Haaland
Kjartan er utdanna friluftslivlærar frå Universitetet i Sørøst-Norge. Han flytta til Nordfjordeid enkelt og greit på grunn av dei uendelege moglegheitene for friluftsliv. Her kan han klatre, surfe, segle, padle, gå på topptur, stå på ski og truger, sykle i fjellet, fiske, bade, og generelt berre nyte livet. Sjølv om klatring og ski i fjellet er det han dyrkar aller mest, har han ei svært allsidig friluftslivkompetanse og -interesse.
I løpet av skuleåret skal vi utforske, og gjerne utfordre oss litt, i ei rekke av elementa eg trivst aller best!
Etter eit år på "Friluftsliv All-inclusive" vil de kunne dra ut i naturen heilt på eiga hand og bruke den for det den er verd. De vil mellom anna få grunnkurs i kajakk, slik at de kan leige kajakkar i heile Norge. Brattkort i klatring gir dykk tilgang til alle klatresenter, samt kunnskap til å klatre i utandørs klatrefelt der de måtte ønske. De får også førstehjelpskurs, og øving på dette i praksis. I tillegg får de prøve ei rekke aktivitetar ute i naturen gjennom sesongene.
Det viktigaste for meg som lærar er at vi er samla som ei gruppe, at utfordringane og læringa skjer i trygge rammer, og ikkje minst at vi har det gøy i lag!
Fellesturar på skulen
Fellesturane er ein viktig del av Fellesfaga på skulen, og er ein viktig arena for å møtast på tvers av linjene. På desse turane dreg alle elevane saman til reisemål i regionen vår:
Samspel med dei andre linjene
For at året på Fjordane skal bli så meinngsfullt og lærerikt som mogleg, er vi mykje saman på tvers av linjene. Friluftsliv All-inclusive vil særleg bruke tida si saman med elevar og lærarar på Friluftsliv i samarbeid med Røde Kors. Dei to friluftslivlinjene skal mellom anna dra saman på linjetur til Alpane!
Å kunne samarbeide med alle er viktig på Fjordane - tenk kva vi kan lære av kvarandre! Hesten er ein fantastisk ven å ha med på tur, og han har vore brukt i arbeid og rekreasjon i hundrevis av år. Vikingane er ekspertar på å nytte naturen til å lage ulike reiskapar, og kan vise oss korleis vi tovar ull eller lagar vår eigen kniv. Styrke og smidighet er også nødvendig når ein skal være aktive ute, og kven passar vel ikkje betre å leike med enn elevane på nysirkuslinja vår?