Kreativ saum og strikk
Kreativ saum og strikk
Skap din eigen stil med kreativ saum og strikk
Drøymer du om å sy og strikke dine eigne kle, utvikle ein berekraftig garderobe og finne din eigen stil? På denne linja får du fridom til å utforske kreativitet gjennom saum, strikk, redesign og gjenbruk. Du lærer ulike teknikkar, konstruerer eigne mønster og byggjer opp ei garderobe som passar perfekt til din kropp og stil.
Eit inspirerande og kreativt miljø
Linja har eige syrom som er ope dag og kveld, slik at du kan jobbe vidare med prosjekta dine når det passar deg. Kvar elev har si eiga symaskin, som raskt blir din bestevenn. Vi avsluttar året med eit moteshow der du får vise fram dine eigne design!
Her får du moglegheit til å:
Konstruere mønster tilpassa din eigen kropp
Sy av metervare etter ferdige mønster
Lære ulike sy-teknikkar og modellering
Sy di eiga festdrakt
Redesign og oppsirkulere brukte klesplagg
Fotografere eigne plagg og utvikle visuell presentasjon
Fagleg utbytte
Strikk og tekstilkunst
Strikking er ein naturleg del av å lage sin eigen garderobe. Du får jobbe med ulike fargekombinasjonar, garnkvalitetar og teknikkar.
Utforske eigne mønster
Strikke etter oppskrifter med alternativt garn
Handfarge garn
Reparere og redesigne strikkaplagg
Innføring i nålebinding, brodering, toving og brikkebandsveving
Du treng ingen forkunnskapar for å byrje på kreativ saum og strikk. Vi startar med prosjekt som gjer deg trygg på symaskina, og gjennom året vil du opparbeide deg verdifulle ferdigheiter som du kan bruke vidare i livet. Vi fokuserer på slow fashion, berekraft og kreative løysingar for framtida.
Samarbeid med andre linje
Gjennom året samarbeider vi med ulike linjer. Der får vi prøve oss på litt andre teknikkar og vere ilag med dei andre linjene.
Kunst: Keramikk
Vikingliv: Handsaum av historiske drakter, brikkeband og toving
Linjeturar
Gjennom året reiser vi på fleire inspirerande turar for å hente inspirasjon, jakte på bruktfunn og utforske tekstilverda.
FÆBRIKSTAD – inspirasjon og workshops
Bergen – bruktbutikkar og skattejakt
Hoddevika, Krokpollen, Stigedalen – fellesturar med skulen
Seilas ved kysten – fellestur med fokus på natur og tradisjonar
Europareise – København, Bremen, Amsterdam
Alle turar er inkluderte i linjeprisen.
Lærarane våre
Ingeborg
Ingeborg er lidenskapeleg glad i strikk, garn, mønster og oppskrifter. Ho er oppteken av passform og likar seg best i ull, både vinter og sommar. Dei seinare åra har plantefarging av garn gått i haudet på ho. Når dei kjemiske prosessane funkar, vil du oppleve Ingeborg som euforisk. DÅ er det kjekt å vere rundt henne. Ingeborg er tydeleg, rettferdig og omsorgsfull. Ho har god humor og ler best av sine eigne vitsar.
Heidi
Heidi er kreativ og elskar å sy. Ho er oppteken av at plagga skal sitte riktig på akkurat din kropp og at finishen er god. Er veldig glad i gode bruktfunn og spennande materiale. Utdanninga innan saum tok ho på Raulandakademiet. Heidi har eit farleg konkurranseinstinkt når det kjem til det meste, er sprudlande og får folk lett i godt humør. Ho er ein god samtalepartnar, som gir gode råd både på lyse og mørke dagar.
Spørsmål om linja Kreativ saum og strikk?
Eller kanskje du lurer på noko anna om Fjordane folkehøgskule eller Nordfjordeid? Ta gjerne kontakt via kontaktskjemaet vårt, eller ring oss på telefon: 57 88 98 80.